Syltelabbar er nesten gått av moten. Det heiter seg at det går ein dram for kvart bein i syltelabben, og vettuge folk har rekna til 30 bein.

Kok og legg skolda griselabbar i ein lake av 9 delar vatn, 1 del salt, litt sukker og eddik. Labben kan du gjerne dele i to. Lefse/flatbrød høyrer til.

Ribbe, medisterkaker og medisterpølser er julekveldsmaten framfor noko anna her i landet. Naturleg nok er det mange måtar å laga til ribba på, og ikkje minst råd om korleis få til sprø svor.

Mitt forslag er:

Rut svoren 1 døgn før steiking og gni ribba med 1 ts salt og ½ ts pepar pr. kg ribbe. Legg ribba kjølig.

Legg ribba på rist over langpanna og steik ho så langt ned i omnen som mogleg. Steikjetemperatur 175°C og steikjetid 1-1½ time.

Deretter plasserer du ribba øvst i omnen og set termostaten på 225°C. La ribba steikje vidare ca ½ time, eller til svoren er sprø og blærar seg. Ta ribba ut av omnen og la ho kvile i minst 10 minutt før ho blir skoren opp.

Medisterpølse
1 ¾ kg magert svinekjøt
¾ kg spekk
50 g salt
75 g potetmjøl
1 ¼ l mjølk
½ ts pepar
½ ts ingefær
½ ts nellik
litt riven muskatnøtt

Mal kjøtet med salt og potetmjøl 3 gonger i kjøtkvern. Bland mjølk og krydder og spe deigen sakte. Rør godt heile tida. Mal spekket 2-3 gonger i kjøtkvern. Rør forsiktig det malne spekket inn i deigen så han blir glatt og fin. Stapp farsen i kroktarm. Trekk pølsene ved 85°C i 15-20 minutt. Krydre gjerne kokevatnet med (pr. liter):

1ss salt
4-5 stk Brimi heil pepar
2 laurbærblad
½ lauk

Pølsene må ikkje koke. Da sprekk dei. Om du vil kan pølsene brunast i steikjepanne eller saman med ribba dei siste minutta i steikjeomnen.

Medisterfarse til kaker
750 g magert svinekjøt
225 g spekk
1 ss salt
3 ss potetmjøl
7 dl mjølk
1 ts pepar
litt ingefær, nellik eller riven muskatnøtt

Lag deigen som til medisterpølse. Steik medisterkaker på vanleg måte.

Grov julepølse
Det finst mange oppskrifter på grov julepølse. Denne inneheld storfe og sau - med smak av ingefær.
800 g storfekjøt
350 g sauehjarte
150 g svor
600 g sauekjøt
1 ts pepar
½ ts ingefær
60 g salt
75 g potetmjøl

Kok svoren til han blir mjuk. Svoren gjev fin smak og gjer at pølsa heng godt saman. Bruk 45 g av saltet til å forsalte sauekjøtet i 3 døgn. Mal kjøt, svor og hjarte ein gong på kjøtkvern. Bland det godt saman med krydder og potetmjøl. Trur du pølsefarsen er noko for fast, kan du spe han ut med litt vatn.

Stapp farsen i kroktarm. Bind endane med hyssing. La pølsene trekkje i vatn ved 85°C i 15-20 minutt. Vatnet må ikkje koke. Da vil pølsene sprekke.

Server julepølse med kålrotstappe og kokte poteter. Dersom du sløyfer potetmjølet, kan oppskrifta brukast til spekepølse.

Bruk heilt fersk fisk, vask han grundig i fleire vatn og tørk med klede. Fisken må vera heilt rein for blod.

Legg fisken lagvis i ein butt med buken vendt på skrå opp. Strø ei matskei salt og ei teskei sukker over kvart lag. Legg press på toppen og la det stå i 2-3 døgn, fyrste døgnet i romtemperatur for å få gjæringa i gang, deretter på kjølerom. Det skal vera tett lokk på heile tida.

Etter 2-3 døgn vil det ha danna seg lake. Dersom han ikkje står over fisken, kok ein lake av: 3 l vatn, 1 dl salt, 2 ts sukker og fyll opp. Fisken er ferdig etter 5-6 veker. Det er viktig å skifte lake dersom han blir stygg. Bruk da same oppskrifta som nemnt ovafor.

Rakefisken skal serverast med lefse eller flatbrød og meierismør. Mange vil ha akevitt til, medan andre klarar seg utan. Øl høyrer med.