Skal ein lage pinnekjøt sjølv, er det viktig at ein vel side med kam av ung sau, eller aller helst av stort lam med god kjøtfylde. Er kjøtet for magert blir pinnekjøtet lett tørt.

Bruk ei balje som er god og stor. Dryss eit lag grovt salt i botnen av balja. Legg i kjøtet og dryss godt med salt oppå. Kjøtet skal dekkjast heilt av saltet. Set balja kjølig i 1½ - 2 døgn alt etter kor feit og stor sida er.

Ta opp kjøtet og tørk av saltet. Heng kjøtet til tørking ein luftig plass i 6-7 veker.

Regn 250-300 g pinnekjøt pr. person. Del sida i passande serveringsstykke (mellom kvart ribbein). Vatn ut kjøtet natta over. Legg bjørkepinnar (utan bork) i kryss i botnen av ein stor og vid kjele. Du kan og bruke ei vanleg metallrist. Hell vatn i kjelen så det når opp til rista. Det må ikkje koma vatn på kjøtet.

Legg i kjøtet og sett lokk på kjelen. La pinnekjøtet koke friskt i 2-2½ time. Etterfyll vatn i kjelen viss det kokar tørt. Når kjøtet losnar lett frå beinet er pinnekjøtet ferdig.

Server med kokte poteter, kålrotstappe og eventuelt lefse.

KÅLROTSTAPPE
1 kg kålrot
3 middels store poteter
100 g smør
mjølk/fløyte
salt og nykverna Brimi pepar etter smak

Kok kålrot og poteter til det er mørt. Mos det med ei potetmospresse saman med smøret, eller kjør det i ei kjøkenmaskin. Spe med mjølk eller fløyte, (eller vatnet du koket kålrota i), til stappa har passe konsistens. Smak til.