Bruk heile lammesida til lammerull. Bein ho ut, og skjer ho til så ho får rette sider.

2 ts timian
½ ts nykverna Brimi pepar
2 ts salt
2 ts gelatinpulver eller 2 plater gelatin
2 ss finhakka lauk
1 ss finhakka purrelauk

Tips: I staden for timian kan du prøve Brimi lammekrydder med koriander eller peparmynte. Da vil du få ein annan smak.

Legg "avskjer" av rullen og krydderblandinga jamt fordelt utover lammesida. Rull skinnet fast saman rundt fylla. Fest rullen med nåler eller liknande så han ikkje glir opp. Surr med hushaldningssnøre eller bomullsgarn. Rullen skal vera fast og jamt surra. For å få krydderet til å trekkje jamt ut i rullen, bør han pakkast og leggjast i kjøleskåpet natta over.

Pakk rullen i eit bomullsklede og surr fast og jamt rundt med hyssing. Legg rullen i kokande vatn som er krydra med salt, 6-7 heile Brimi peparkorn og 2-3 laurbærblad. La han trekkje ved kokepunktet i ca. 1 time. Tida kjem an på kor stor og tjukk rullen er. Ta rullen opp av vatnet og la han kvile i 15 minutt før han blir lagt i press i 5-6 timar.