Til 4 personar:

5 dl mjølk
2 ½ dl kremfløyte
4 egg
100 g sukker
1 vaniljestong

Karamell til forma (1 liter):
125 g sukker
1 dl vatn

Smelt sukkeret i ei steikjepanne med nokre dråpar vatn til det er nøttebrunt. Unngå å røre før det byrjar å bli brunt. Kok ut panna med vatnet og la det koke ca. 1 minutt. Hell det i forma. Drei forma så ho blir jamt glasert med karamellen.

Kok opp mjølk og fløyte saman med vaniljestonga. Vaniljestonga deler du i to på langs og skrapar ut frøa. Kok med både frøa og stonga.

Tips: Vaniljestonga kan du bruke fleire gonger eller samle på i eit glas med sukker. Helst demerarasukker. Når du byrjar å få ein del vaniljestenger på glaset, kan du kjøre både stenger og sukker i ei kjøkenmaskin og sikte det etterpå. Da har du ditt eige vaniljesukker.

Pisk egga lett saman med sukker. Bland det i fløytemjølka. Slå alt gjennom ei sil.

Set ei langpanne midt i steikjeomnen og fyll henne med 1/3 vatn. Forvarm steikjeomnen til 120°C.

Fyll røra i den glaserte forma. Steik karamellpuddingen i ca. 1 time. Avkjøl puddingen i forma før han blir kvelva over på eit fat. Pynt eventuelt med piska krem, bananskiver, bær eller frukt.